Ditari 1 - 15.06.2018

Muslimanët në të gjithë botën festojnë Fitër Bajramin. Në Maqedoni, manifestimi qëndror u mbajt në xhaminë Mustafa Pasha në Shkup, në Tiranë sërish Bajrami u fal në bulevard pasi xhamia e madhe ende nuk ka mbaruar. Pelegrinë të shumtë festuan edhe në Mekë.
Në këtë ditë feste TVM 2 ju fton të ndihmojmë familjen Terziu nga Shkupi. Agimi, kujdeset vetë për motrat e tij të verbëra. Nuk marrin ndihmë nga shteti, e sigurisht që sëmundja u pamundëson të punojnë. Sot është festa e mëshirës, solidaritetit dhe dashurisë . Është dita kur të gjithë ne duhet të mendojmë për familjen Terziu.
Marrëveshja mes Shkupit dhe Athinës, do të nënshkruhet të djelën një pjesë në territorin grek e një pjesë në Prespë të Maqedonisë, konfirmon zëdhënësi i qeverisë Mile Boshnjakovski. Nënshkrues do të jenë ministrat e Punëve të Jashtme, Nikos Kotzias e Nikolla Dimitrov me pjesmarrjen e dhe të kryeministrave Zaev e Tsipras dhe të ndërmjetësuesin e OKB-së, Matthju Nimitz.
U lëshua në përdorim rruga e re mes Sarajit dhe Rashces, që shkurton në vetëm 3.5 kilometra udhëtimin e banorëve nga gati 10 sa ishte aktualisht. Për këtë projekt, banorët dhe Komuna e Sarajit ndanë 6 milion denarë ndërsa 4.5 milion u siguruan nga qyteti i Shkupit.