Ditari 1 - 09.05.2025

TOP LAJMET
Evropa sot shënon 9 Majin - Ditën e Fitores ndaj Fashizmit. Në Shkup u përkujtuan heronjtë, që flijuan jetën për liri dhe paqe. Zyrtarët theksuan se kjo rrugë është zgjedhje e vlerave - paqes, drejtësisë dhe lirisë. Në këtë ditë udhëheqësit evropianë ritheksuan përkushtimin për paqe, siguri dhe unitet, me fokus të veçantë në mbështetjen për Ukrainën.

MPB ka arrestuar shtetasin turk K.K, i cili dyshohet për vrasjen e bashkëqytetarit të tij E.O. në një kafene në Shtip. Së bashku me katër bashkëpunëtorë, ai tentoi të arratisej, por u kap pranë pikës pagesore “Milladinov”. Është sekuestruar arma e krimit dhe po vazhdojnë hetimet. Shkaqet e vrasjes ende mbeten të panjohura.

Bëhen plot 10 vjet nga ngjarja që tronditi, jo vetëm Kumanovën, por gjithë shtetin.
Një përplasje e armatosur në Kumanovë, midis forcave policore të vendit dhe një grupi të armatosur, la si pasojë 8 policë të vrarë, 37 të tjerë të plagosur dhe 10 persona të vrarë nga grupi i armatosur. Ka reaguar koalicioni VLEN.

Rreth 20 mijë vullnetarë morën pjesë në “Pastrimin Gjeneral të Fundjavës”, aksionin më të madh ekologjik në Ballkan. Aktiviteti u zhvillua në 500 lokacione, përfshirë edhe Akvaduktin e Shkupit. Më shumë se 600 organizata u angazhuan, duke dërguar mesazhin e rëndësisë së ruajtjes së natyrës. Iniciativa synon të bëhet traditë e qëndrueshme mjedisore.