Ditari 1 - 01.08.2025

TOP LAJMET
Situata e sigurisë në vend dhe rajon është stabile, nuk priten probleme ose dilema sigurie, thotë presidentja Gordana Siljanovska - Davkova, pas mbledhjes së Këshillit të Sigurisë. Presidentja Davkova theksoi se në takim është folur për sigurinë në botë dhe ndikimi në rajon dhe vend, zjarret në vend dhe më gjerë, si dhe janë këmbyer ide dhe qëndrime për eurointegrimet.

SHBA-të vendosin tarifa doganore më të larta për 69 vende në mbarë botën. Maqedonia e Veriut është përfshirë me një normë prej 15% ,aq sa arrijnë edhe tarifat që do të aplikohen për Bashkimin Evropian. Kryeministri Hristijan Mickoski, falënderoi SHBA-në dhe është optimist se tarifat doganore do të ulen edhe më tepër.

Opozita maqedonase kërkon nga presidentja e shtetit Gordana Siljanovska-Davkova, të mos i nënshkruajë dekretet për ligjet për policinë dhe punët e brendshme. Sipas tyre, këto janë ndryshime skandaloze dhe të rrezikshme që shfuqizojnë profesionalizmin në polici. Për VMRO-DPMNE-në, zgjidhjet e reja ligjore do të sjellin rend dhe mundësi të barabarta.

BDI fton të gjitha partitë që të mbështesin propozim-ligjin për “veting”, sepse sipas tyre, nuk mund të ketë shtet funksional dhe shoqëri të drejtë, pa një proces gjithëpërfshirës të “vetingut”. Nga koalicioni VLEN ftojnë BDI-në që me “veting” të fillojë nga vetja dhe të kontrollojë pasurinë e vetë anëtarëve kryesor.