Ditari 1 - 15.08.2025

TOP LAJMET
Cveta Ristovska është zgjedhur Zëvendëskryetare e Komisionit Shtetëror për Parandalimin e Korrupsionit, sipas rrotacionit gjashtëmujor të anëtarëve. Komisioni vazhdon të funksionojë pa Kryetar, pas dorëheqjes së Tatjana Dimitrovskës, ndaj së cilës është ngritur aktakuzë.

Maqedonia e Veriut nuk do të tërhiqet nga negociatat me Bashkimin Evropian, pavarësisht kontestimit të Protokollit nga ish-deputetja Popovska, dhe vendimi i Gjykatës Kushtetuese nuk do të ndikojë në synimin strategjik për integrim evropian, thotë kryeministri Mickovski.

BDI dhe Aleanca për Shqiptarët kanë kërkuar dorëheqjen e ministrit të Shëndetësisë, Azir Aliu, duke e akuzuar për mashtrime dhe manipulime politike lidhur me punësimet në Spitalin Klinik të Tetovës. VLEN i ka quajtur këto akuza hipokrite, duke kujtuar se gjatë viteve në pushtet, BDI dhe Taravari nuk sollën asnjë investim madhor në shëndetësi.

Lufta kundër gjuhës së urrejtjes në Maqedoninë e Veriut kërkon angazhim të përbashkët, ndërgjegjësim dhe rol aktiv të mediave dhe edukim mediatik. Ekspertët nënvizojnë se gjuha e urrejtjes në vendin tonë përdoret shpesh në mënyrë strategjike për qëllime politike, ekonomike ose ideologjike.