Ditari 1 - 13.01.2026

TOP LAJMET

Kryeministri Mickoski njoftoi takimin e lidershipit të mërkurën në mesditë. Do të kërkohet konsensus për ligjet reformuese, axhendën e integrimit evropian, shfuqizimin e Qeverisë Teknike si dhe çështje tjera. Koalicioni VLEN ka konfirmuar pjesëmarrjen, LSDM njoftoi bojkot ndërsa BDI pritet të merr vendim në mbledhjen e këshillit të përgjithshëm pasditen e sotme.
Koalicioni VLEN, ka akuzuar deputetët e kualicionit AKI, të kryesuar nga BDI për votimin kundër verifikimit të mandatit të deputetes së VLEN Valbona Adili Emini, e cila erdhi në vendin e deputetit Salim Sylejmanit. Sipas VLEN kjo qasje e deputetë ve të AKI-së, është një akt i pa-precedent, i cili nuk njihet në praktikat parlamentare.
Kryeparlamentari, Afrim Gashi, zhvilloi një takim lamtumirës me ambasadoren e SHBA-së, Anxhela Ageler, duke vlerësuar lart kontributin e saj në forcimin e proceseve demokratike, bashkëpunimin institucional dhe dialogun me Kuvendin. Gashi shprehu mirënjohje për mbështetjen e vazhdueshme të SHBA-së ndaj Maqedonisë së Veriut, duke e cilësuar atë partner strategjik dhe aleat të rëndësishëm.

Numri i personave të infektuar me grip është në rritje, klinikat ambulatore por edhe kapacitetet e spitaleve janë plot. Temperatura e lartë, kolla, dobësia janë simptomat më të zakonshme. Komplikimet nga virusi po bëhen gjithashtu më të zakonshme, veçanërisht tek fëmijët disa prej të cilëve në Klinikën Kozle janë me mbështetje të oksigjenit.