Ditari 1 - 27.02.2026

TOP LAJME
Presidenti i Shqipërisë Bajram Begaj, gjatë vizitës zyrtare në Macedoninë e Veriut, theksoi rëndësinë e përfaqësimit të drejtë të shqiptarëve dhe zbatimit të gjuhës shqipe për stabilitetin dhe integrimin evropian. Presidentja Gordana Siljanovska-Davkova vlerësoi marrëdhëniet pa çështje të hapura mes dy vendeve, duke theksuar përkushtimin për BE përmes reformave.

Arben Fetai ka shkarkuar kryesinë e ASH-së për t’i hapur rrugë unifikimit të VLEN-it në një subjekt të vetëm politik, ndërsa u autorizua të vazhdojë negociatat. Mungesa e Azir Aliu në mbledhje nxiti spekulime për përçarje, por ai theksoi se qëllimi i përbashkët mbetet bashkimi dhe konsolidimi i VLEN-it. Aliu njoftoi se Ilir Demiri i është bashkuar kauzës dhe se po zhvillohen bisedime edhe me deputetë të tjerë të opozitës shqiptare.

Personat me sëmundje të rralla përballen me mungesë buxheti dhe sfida në diagnostikim, ndërsa organizatat dhe autoritetet shëndetësore po përgatitin ligj dhe strategji të re për mbrojtje shëndetësore. Qendrat gjenetike dhe Fondi Shëndetësor kanë siguruar teste dhe paketa ilaçesh, duke synuar përmirësimin e shërbimeve për mbi 1,000 pacientë.

Ministrja e Arsimit, Vesna Janevska, ka deklaruar se projektligji i ri për Arsimin e Lartë nuk do të tërhiqet. Ajo theksoi se vërejtjet konstruktive dhe mangësitë teknike do të inkorporohen nga grupi punues përpara se ligji të kalojë në seancë qeveritare. Sipas saj, çdo shtyrje e miratimit të ligjit do të ishte në dëm të arsimit të lartë, studentëve dhe shtetit.