Ditari 1 - 14.03.2026

TOP LAJMET
Lidhja e Sindikatave të Maqedonisë në protestën e sotme shprehu revoltë duke kërkuar rritjen e pagës minimale në 600 euro dhe rritje lineare të të gjitha pagave të tjera për të paktën 6.000 denarë. Thonë se pagat aktuale nuk po e ndjekin rritjen e shpenzimeve reale të jetesës.

Debati mbi përdorimin e gjuhës shqipe është rikthyer në opinionin publik pas deklaratës së kryetarit të Gjykatës Kushtetuese, Darko Kostadinovski, lidhur me njoftimet e gjobave nga sistemi “Qyteti i Sigurt”. Profesori universitar Bashkim Selmani vlerëson se përdorimi i gjuhës shqipe është i garantuar me amendamentet kushtetuese dhe legjislacionin në fuqi.

Para shënimit të përvjetorit të tragjedisë në Koçan, Qeveria sot organizon një konferencë ndërkombëtare. Qëllimi është analizimi i reagimit të institucioneve, ekspertëve shëndetësorë dhe partnerëve ndërkombëtarë, si dhe vazhdimi i zgjidhjeve sistemore për një gatishmëri më të mirë në situata krize.

Piku i gripit sezonal tashmë ka kaluar dhe numri i pacientëve me viroza është në rënie, njofton mjeku Abdylhamit Kasami. Ai thekson se rastet më të rënda janë shfaqur kryesisht te personat me sëmundje kronike, gratë shtatzëna dhe fëmijët e vegjël. Mjeku rekomandon rritjen e imunitetit përmes ushqimit të shëndetshëm, gjumit të rregullt dhe aktivitetit fizik.