Ditari 1 - 01.01.2026

TOP LAJMET
Shkupi është “zgjuar” i qetë pas festimeve për natën e ndërrimit të viteve. Shumica e qytetarëve festuan në shtëpitë e tyre, ndërsa disa u mblodhën në lokale dhe sheshin e qytetit. 31 qytetarë përfunduan në spitale për shkak të konsumit të tepruar të alkoolit.

Në minutat e para të Vitit 2026, Shkupi regjistroi tri lindje të suksesshme, dy vajza në Klinikën "Nënë Tereza" dhe një në Klinikën e Gjinekologjisë. Autoritetet vizituan maternitetet, duke uruar nënat dhe stafin mjekësor dhe duke theksuar rëndësinë e investimeve në shëndetësi dhe mbështetje për familjet.

Qipro merr presidencën gjashtëmujore të BE-së, duke fokusuar agjendën në forcimin e sigurisë rajonale, menaxhimin e migracionit dhe integrimin e Ballkanit Perëndimor. Po ashtu, do të angazhohet për mbrojtjen e klimës, energjinë e rinovueshme dhe sovranitetin digjital.

Çmimet e reja të energjisë elektrike hyjnë në fuqi, duke rritur çmimet në të katër blloqet e konsumit deri në 3.84%. Qytetarët shprehen të shqetësuar se kjo do të sjellë rritje të çmimeve të produkteve dhe shërbimeve duke vën në pah , disbalancin e të hyrave dhe shpenzimeve të jetesës.