Ditari 1 - 14.01.2026

TOP LAJMET
Me iniciativë të kryeministrit dhe liderit të VMRO-DPMNE-së, Hristijan Mickoski, në “Klubin e Deputetëve u mbajt takim i liderëve politikë. Ashtu siç ishte paralajmëruar në takim u diskutua për ligjet reformuese në drejtësi, Qeverinë teknike dhe ndryshimet zgjedhore. Ndërkohë nga LSDM nuk morën pjesë në takim dhe akuzuan koalicionin qeveritar se synon shfuqizimin e qeverisë teknike për të fshehur korrupsionin dhe keqpërdorimet në institucione.

Një zjarr me pasoja tragjike mbrëmë në Tetovë i mori jetën një 76-vjeçari, ndërsa djali i tij mbeti i plagosur rëndë. Shkaqet e zjarrit po hetohen nga autoritetet.

Ministria e Ekonomisë, në bashkëpunim me Zyrën e Bashkimit Evropian, ka prezantuar Strategjinë Nacionale për Zhvillimin e Ndërmarrjeve të Vogla dhe të Mesme 2025-2030. Strategjia synon forcimin e konkurrueshmërisë, inovacionit, transformimin digjital dhe tranzicionin e gjelbër, me mbështetje financiare dhe teknike nga BE-ja.

Lidhja e Sindikatave të Maqedonisë paralajmëron protestë për rritjen e pagës minimale në 600 euro dhe shtesën prej 100 euro për pagat e tjera. Punëdhënësit e konsiderojnë të drejtë protestën, por e vlerësojnë kërkesën si joreale për sektorët me paga të ulëta dhe paralajmërojnë rreziqe për qëndrueshmërinë e kompanive.