Ditari 1 - 15.03.2026

TOP LAJMET
Një vit pas tragjedisë në diskotekën “Puls” në Koçan, disa nga të lënduarit u mblodhën në një turne basketbolli, duke dëshmuar se sporti mund të shërbejë si terapi për rikuperimin fizik dhe psikologjik. Kujtuan momentet e tragjedisë dhe thonë se rikuperimi është i ngadalshëm, por gjendja e tyre shëndetësore po përmirësohet gradualisht.

Mbetjet industriale pranë ish-fabrikës “Jugohrom” vazhdojnë të paraqesin rrezik për ndotjen e ujërave nëntokësore dhe për burimin Rashçe, nga i cili furnizohet me ujë të pijshëm qyteti i Shkupit. Ekspertët kërkojnë që institucionet sa më shpejt të marrin masa.

Koalicioni VLEN po avancon drejt transformimit në një parti të vetme politike. Politologu Qani Nuhiu vlerëson se bashkimi është i mundur, por paralajmëron se funksionimi i një partie të përbashkët mund të përballet me sfida në ruajtjen e kohezionit të brendshëm dhe harmonizimin e identiteteve politike të subjekteve përbërëse.

Në Maqedoninë e Veriut mungon vullneti politik për realizimin e reformave kyçe që lidhen me procesin eurointegrues, vlerëson Profesori universitar Mersel Bilalli. Ai vlerëson se ndryshimet kushtetuese janë kusht për avancimin e procesit eurointegrues dhe hapjen e kapitujve të negociatave me BE-në.