Ditari 1 - 24.12.2025

TOP LAJMET
Banorët e lagjes Serovë protestojnë pasi prej katër ditësh janë pa energji elektrike. Ata shprehen se paguajnë rregullisht faturat dhe kërkojnë nga EVN zgjidhje të menjëhershme, duke paralajmëruar vijimin e protestave. Nga EVN bëjnë të ditur se defekti ka ardhur si pasojë e vjedhjeve të energjisë dhe pengimit të ekipeve për rikonstruksionin e rrjetit dhe zhvendosjen e orëmatësve.

Kuvendi emëroi Bekim Salin ministër për Çështje Evropiane dhe Muhamet Hoxhën ministër të Mjedisit Jetësor dhe Planifikimit Hapësinor, ndërsa paraprakisht shkarkoi Orhan Murtezanin nga funksioni i tij. Debati parlamentar u shoqërua me kritika nga opozita.

Maqedonia e Veriut mbetet vendi me çmimet më të ulëta të ushqimit në Europë, sipas të dhënave të Eurostatit, ndërsa rritjet vërehen vetëm te produktet e lidhura me bursat botërore., thotë Ministri i Ekonomisë Besart Durmishi. Ai paralajmëroi rritje të pagës minimale në muajin mars.

Qeveria miratoi ndarjen e fondeve për blerjen e 100 ambulancave të reja, me vlerë rreth 7.5 milionë euro, të cilat do të shpërndahen në institucionet publike shëndetësore në vend, me qëllim përmirësimin e shërbimeve emergjente dhe përmbushjen e nevojave të pacientëve. U mor vendim edhe për zgjidhjen e problemit shumëvjeçar të parkingut në Qendrën Klinike “Nënë Tereza” në Shkup.