Ditari 1 - 25.02.2026

TOP LAJME
Me dëshmitë e pesë dëshmitarëve të Prokurorisë vazhdon procesi gjyqësor për zjarrin në diskotekën “Pulse” në Koçan, ku humbën jetën 63 persona dhe mbi 220 u lënduan. Avokati kërkoi ndërprerje të procesit për shkelje të barazisë së të akuzuarve, por gjykatësja e refuzoi. Prindërit kërkojnë gjykim të drejtë dhe përgjegjësi.

Kryetari i Këshillit të Prokurorëve, Bashkim Selimi, deklaroi se përgjegjësia për propozimin e arrestit shtëpiak ndaj Artan Grubit i takon Kryeprokurorisë. Edhe kryetari i Këshillit Gjyqësor, Aleksandar Kambovski, tha se nuk janë plotësuar kushtet për përcaktim përgjegjësie.

Deputetët dhanë dritë jeshile që me procedurë të shkurtuar të miratohen pakoja e ndryshimeve ligjore për llogaritjen e pagave të personave të zgjedhur dhe të emëruar, të paraqitura nga VMRO-DPMNE. Por, Shoqata e Prokurorëve dhe gjyqtarët kërkojnë që të
tërhiqet nga rendi i ditës korrigjimi ligjor, me të cilin propozohet ndryshimi i koeficientëve.

Në Universitetin e Tetovës u mbajt debat publik mbi Projektligjin për Arsimin e Lartë. Rektori Jusuf Zejneli dhe Senati i UT-së kërkon rishikim të ligjit, duke theksuar kërcënimin e autonomisë universitare dhe shqetësime për akreditimin e doktoraturave. Ministrja e Arsimit, Vesna Janevska, tha se ligji nuk do të tërhiqet.