Ditari 1 - 07.10.2026

TOP LAJMET
Pas një ngërçi të gjatë politik, Kosova shmangu zgjedhjet e parakohshme, pasi Kuvendi zgjodhi me 81 vota Justina Shiroka-Pula presidente të Republikës. Para votimit, deputetët miratuan edhe ndryshimet në Ligjin për dhomat e specializuara në Hagë. Miratimi u mirëprit nga shoqatat e dala nga lufta dhe protestuesit në Prishtinë.

Zgjedhja e Justina Shiroka-Pula, presidente e Kosovës u përshëndet nga liderët shqiptarë në Maqedoninë e Veriut dhe Shqipëri. Ata e vlerësuan zgjedhjen si hap drejt stabilitetit politik dhe tejkalimit të krizës institucionale në Kosovë.

Maqedonia e Veriut dhe Bullgaria do të zhvillojnë nesër takim dypalësh në Sofje, me fokus marrëdhëniet fqinjësore dhe integrimin në BE. Mickoski tha se dialogu është rruga drejt përparimit, LSDM-ja e kundërshtoi takimin ndërsa Aleanca për Shqiptarët kërkoi plan konkret për zhbllokimin e integrimit.

Gjykata Kushtetuese nuk e pranoi iniciativën e deputetit Skender Rexhepi për rregulloren e dokumentacionit pedagogjik në shkollat e mesme. Rexhepi e kontestoi atë për shkak se ishte publikuar vetëm në gjuhën maqedonase, duke pretenduar shkelje të Ligjit për përdorimin e gjuhëve.