Ditari 1 - 27.07.2025

TOP LAJMET
Vendi po përballet me një valë të të nxehtit me temperatura deri në 43°C. Edhe pse sot ka një rënie të lehtë, masat mbrojtëse mbeten në fuqi deri në mesnatë. Institucionet shëndetësore apelojnë për kujdes të shtuar, sidomos për të moshuarit dhe fëmijët. Qytetarët këshillohen të qëndrojnë në ambiente të freskëta dhe të konsumojnë lëngje.

Në 24 orët e fundit janë regjistruar 33 zjarre në vend, 16 janë shuar, 5 nën kontroll dhe 12 ende aktive, njofton QMK. Më kritike mbetet zona Vasilevë-Radovish-Berovë dhe rajoni i Prilepit. Situata me zjarret ka nxitur përplasje mes LSDM-së dhe VMRO-DPMNE-së për përgjegjësinë dhe menaxhimin. Autoritetet sigurojnë se po monitorojnë terrenin nga afër.

Zgjedhjet lokale pritet të shpallen në fillim të gushtit dhe do të mbahen në tetor. Analisti Bekim Adili thotë se partitë shqiptare do të testojnë legjitimitetin e tyre në nivel lokal, me përplasje të mundshme etnike në disa komuna si Kërçova. Roli i diasporës pritet të jetë vendimtar.

Seanca për konstituimin e Kuvendit të Kosovës mbrëmë dështoi sërish. Në fuqi ka hyrë vendimi i Gjykatës Kushtetuese që ndalon veprimet e deputetëve pas 26 korrikut. Gjykata paralajmëron rrezik për rendin kushtetues. Analisti Tomor Avdia thotë se vendi përballet me zgjedhje të reja ose anulim mandatesh.