Ritmi i Ditës - 28.07.2025

TOP LAJMET

Gjatë 24 orëve të fundit janë regjistruar 51 zjarre në vend, nga të cilat 8 mbeten aktive, 7 janë nën kontroll dhe 36 janë shuar. Zjarret aktive janë kryesisht në Niviçino, Goteni i Madh dhe Malet e Maleshevës. Autoritetet po monitorojnë situatën nga afër. Situata me zjarret ka nxitur përplasje mes pushtetit dhe opozitës për përgjegjësinë dhe menaxhimin.

Partitë politike po finalizojnë kandidaturat për kryetarë komunash. VMRO-DPMNE dhe VLEN kanë marrëveshje për mbështetje të ndërsjellë. VLEN pritet të dalë me emrat deri në fundjavë. Fronti Evropian dhe ASH e Taravarit do të garojnë me lista të përbashkëta, përfshirë kandidatin për Shkupin.

Është rikthyer përmendorja e Andon Llazov-Qoseto në Shkup. Zëvendëskryeministri i parë, Izet Mexhiti, e cilëson provokim politik nga Arsovska, Osmani dhe Bexheti. Arsovska e quan figurë historike, ndërsa LSDM e kritikon si veprim të panevojshëm dhe të paprioritar për qytetin.

Sipas Entit Shtetëror të Statistikave, çmimet e shitjes së produkteve industriale në tregun vendor janë rritur me 0.2% në qershor 2025 krahasuar me muajin paraprak dhe me 5.3% krahasuar me qershorin e vitit të kaluar. Kryeministri Mickoski njoftoi se masa të mundshme do të shqyrtohen pas përfundimit të analizës së tregut.