Ditari 1 - 20.05.2026

Qeveria premton zgjidhje për kërkesat e studentëve shqiptarë lidhur me provimin e jurisprudencës. Kryeministri Hristijan Mickoski deklaroi se po punohet për një zgjidhje afatgjatë, e cila do të dërgohet edhe në Komisionin e Venedikut. Nga VLEN, Bilall Kasami tha se brenda muajit qershor do të nisë procedura për ndryshimin e ligjit të jurisprudencës dhe se synimi është që të gjitha provimet profesionale të mund të jepen në gjuhën shqipe.

Komisioni Evropian ka miratuar këstin e ri prej 65,7 milionë eurosh për Maqedoninë së Veriut në kuadër të Planit të Rritjes për Ballkanin Perëndimor dhe Mekanizmit për Reforma dhe Rritje. Zëvendëskryeministri i Parë dhe Ministri për Çështje Evropiane, Bekim Sali, e vlerësoi këtë vendim si dëshmi të progresit dhe besimit të BE-së në agjendën reformuese të vendit.

Dogana e Maqedonisë së Veriut ka konfiskuar gjysmë milioni euro në pikën kufitare të Tabanovcës. Drejtori i administratës doganore Boban Nikolovski, tha se paratë u gjetën në një bunker të instaluar posaçërisht në një minibus që vinte nga Shqipëria.

Shkollat e mesme në Tetovë prezantuan ofertat arsimore para semimaturantëve në sheshin “Iliria”, ndërsa autoritetet komunale thanë se drejtimet janë përshtatur me tregun e punës dhe kushtet në shkollat e mesme janë përmirësuar. Ndërkohë, shqetësim mbeten kushtet në disa shkolla fillore, si dhe rënia e numrit të nxënësve në zonat malore.