Ditari 1 - 14.07.2026

TOP LAJMET
Tetë ministra të rinj morën detyrat pas rikonstruimit të Qeverisë, i cili ka ndarë opinionet politike. VLEN e cilësoi si hap për forcimin e stabilitetit, ndërsa opozita e kritikoi si mungesë vizioni dhe zgjidhjesh konkrete.

Euroambasadori Mihalis Rokas kërkoi konsensus politik për reformën e Kodit Zgjedhor, duke paralajmëruar rrezikun e humbjes së 4.2 milionë eurove nga fondet e BE-së. Partitë vazhdojnë të kenë dallime për votimin e diasporës dhe ndryshimet zgjedhore.

Gjykata Kushtetuese kërkoi nga partitë politike të mos ndërhyjnë në punën e saj dhe të respektojnë pavarësinë e gjyqësorit. Kryetari Darko Kostadinovski tha se vendimet merren vetëm mbi bazën e Kushtetutës dhe ligjit, duke mohuar prapavijë etnike në rastin e emërtimeve të rrugëve në Tetovë.

Shqipëria zhvillon sot në Bruksel Konferencën e 9-të ndërqeveritare me BE-në, ku pritet të mbyllë tre kapituj të negociatave. Autoritetet shqiptare e cilësojnë këtë një hap të rëndësishëm drejt integrimit evropian dhe synimit për përfundimin e procesit teknik deri në vitin 2027.