Ditari 1 - 05.12.2023

Ka përfunduar obduksioni i trupit të 14-vjeçares Vanja Gjorçevska, i cili duhet t’i japë përgjigje shumë pikëpyetjeve rreth asaj se si është vrarë dhe kur ka ndodhur vdekja. Nga VMRO-DPMNE-ja kërkojnë dorëheqjen e ministrit të Punëve të Brendshme, Oliver Spasovski, për shkak të lëshimeve që sipas tyre ka bërë MPB-ja. Por me këtë nuk pajtohen nga LSDM-ja teksa thonë se organet shtetërore në mënyrë efikase kanë zbuluar autorët e krimit.

Lufta kundër dhunës familjare mbetet akoma sfidë e shoqërisë sonë.
Në nivel vjetor në adresë të institucioneve kompetente mbërrijnë mbi 1,000 ankesa dhe në të shumtën e rasteve viktima janë gratë.Në këtë temë u diskutua në tryezën e rrumbullakët që organizoi zyra e OSBE-së në Shkup në kuadër të fushatës 16 ditore kundër dhunës për barazi gjinore, organizuar nga misioni i OSBE-së në Shkup.

Debati për propozim-buxhetin për vitin 2024 ka hyrë në ditën e dytë në Komisionin për Financa dhe Buxhet. Pushteti dhe opozita me qëndrime të ndara rreth hartimit të tij. Sipas pushtetit, buxheti i përshtatur në këtë mënyrë do të sigurojë zhvillim dhe qëndrueshmëri fiskale. Sipas opozitës, propozimi është joreal dhe nuk ofron një strategji për ekonominë. Arka e shtetit për vitin e ardhshëm do të peshojë 5,5 miliardë euro.

Oda Ekonomike e Maqedonisë Veriperëndimore ka prezantuar kompanitë më të suksesshme. Nga OEMVP-ja thonë se sektori i biznesit ka bërë të pamundurën për të mbajtur gjallë ekonominë e vendit duke gjeneruar neto fitim prej 100 milion eurove në vit.