Ditari 1 - 22.11.2024

TOP LAJMET

Shqiptarët në të gjitha trojet etnike dhe diasporë po shënojnë sot 116 vjetorin e Kongresit të Alfabetit, i cili i dha gjuhës tonë alfabetin e unifikuar prej 36 shkronjash. Qeveria e Maqedonisë së Veriut këtë ditë e shënoi me një Akademi solemne, ndërsa zyrtarët shtetërorë dhe liderët politik përcollën urime për të gjithë shqiptarët.
Aktivitetet për Kongresin e Manastirit, në Muzeun e alfabetit kanë filluar që me datë 14 nëntor, për të kulmuar me aktivitetet më 22 nëntor, thotë drejtori i muzeut Nuer Arsllani. Ai thekson se në këtë periudhë janë organizuar ekspozita të ndryshme, promovime librash si dhe konferenca me temë “Zhvillimi i arsimit kombëtarë dhe gjuha shqipe”. Aktivitetet përmbyllen me koncertin e sontëm.
Për herë të parë këtë vit në Shqipëri dita e Alfabetit është shpallur festë zyrtare. Në kuadër të aktiviteteve për shënimin e ditës së alfabetit në Tiranë u prezantua Draft-fjalori i gjuhës amtare, rezultat i një pune 4 vjeçare, që do të përmbajë rreth 120 mijë fjalë, apo gati trefishi i fjalorit aktual. Për hartimin e Fjalorit u ngrit një trupë me 21 punonjës kërkimorë-shkencorë.
Pas vendimit të qeverisë për të intervenuar me rezervat shtetërore të naftës, transporti publik në Shkup ka filluar të normalizohet. Drejtori i Ndërmarrjes së transportit publik Dragi Kushovski, ka bërë të ditur se kanë pranuar sasi të naftës nga rezervat shtetërore, dhe se furnizimi me naftë po zhvillohet në mënyrë graduale.