Ditari 1 - 04.12.2023

Vrasja e nxënëses 14 vjeçare Vanja Gjorçevska dhe 74 vjeçarit Pançe Zhezhovski ka tronditur opinionin në vendin tonë. Për këtë vrasje mizore dyshohen pesë persona , tre janë në paraburgim, njëri është jashtë shtetit, ndërsa babai është ndaluar dhe marrë në pyetje tha Ministri i Punëve të Brendshme Oliver Spasovski. Ai më tej u shpreh se i dyshuari që vrau Vanjën, të cilin e quajti monstër, do të dënohet rëndë. Sipas Spasovskit babai i Vanjës ka dhënë udhëzime për kidnapimin e saj. Qëllimi ishte që të merren para nga nëna e të miturës.

Vrasjen makabre të Vanjës dhe Zhexhovskit shumë keq e kanë përjetuar edhe qytetarët e vendit. Ata kërkojnë zbardhjen e plotë të rastit dhe apelojnë për siguri më të madhe nëpër rrugët e kryeqytetit. Reagojnë edhe partitë politke dhe autoritet shtetërore.

Liderët e partive politike janë dakorduar që zgjedhjet parlamentare të mbahen më 8 maj, të mërkurën. Ata do të jenë së bashku me raundin e dytë të zgjedhjeve presidenciale për të cilat raundi i parë do të jetë më 24 prill, po ditë e mërkurë. 100 ditë para zgjedhjeve ose më 28 janar do të formohet Qeveria teknike dhe se do të respektohet marrëveshja që kryeministri të jetë nga radhët e BDI-së.

Në Kuvend nis debati për propozim buxheti për vitin e ardhshëm i cili peshon 5.5 miliardë euro. Qeveria e karakterizon si një buxhet zhvillimor dhe të qëndrueshëm që ka të gjitha karakteristikat për të mbështetur njëkohësisht zhvillimin. Për opozitën ky propozim buxhet është jo real, dhe i paqëndrueshëm.